பழம்பெரும் திரையிசை பாடகர் ஜெயசந்திரன் உடல் நலக்குறைவால் கேரளாவின் திரிச்சூரில் காலமானார். அவருக்கு வயது 80. பல்வேறு மொழிகளில் 16 ஆயிரத்துக்கும் மேற்பட்ட பாடல்களை பாடி இருந்தாலும், தமிழ் இசை ரசிகர்களை தனது காந்தக் குரலால் தாலாட்டிய பெருமைக்குரிய ஜெயசந்திரனின் திரை இசை பயணம் குறித்து விவரிக்கின்றது இந்த செய்தித்தொகுப்பு...

கேரள மாநிலம் கொச்சியின் ரவிபுரத்தில் பிறந்தவர் பழம்பெரும் பின்னணிப் பாடகர் பாலியத் ஜெயசந்திரக்குட்டன் என்கிற பி. ஜெயசந்திரன்..!

மலையாளம், தமிழ், தெலுங்கு இந்தி கன்னடம் உள்ளிட்ட பல்வேறு மொழிகளில் 16 ஆயிரத்துக்கும் மேற்பட்ட திரையிசைப் பாடல்களை பாடி 5 முறை கேரள அரசின் விருதை பெற்றுள்ளார் ஜெயசந்திரன்.

1973 ஆம் ஆண்டு எம்.எஸ்.விஸ்வ நாதனால் தமிழ் திரைஉலகிற்கு அறிமுகம் செய்யப்பட்ட ஜெயசந்திரன், தமிழ் கவிதையை இனிய பாடல்களாக அரங்கேற்றியவர்

பிறந்தது மலையாள தேசம் என்றாலும் அச்சுப்பிசகாத தமிழ் உச்சரிப்பாலும், தனது காந்தக்குரலாலும் தமிழ் திரை இசை ரசிகர்களை கட்டிபோட்டவர் ஜெயசந்திரன்

இசைஞானி இளையராஜா இசையில் நானே ராஜா நானே மந்திரி படத்தில் விஜயகாந்தின் குரலுக்கு ஏற்றார் போல அவர் பாடிய பாடல் ரசிகர்களை வெகுவாக கவர்ந்தது

1984 ஆம் ஆண்டு வெளியான வைதேகி காத்திருந்தாள் படத்தில் ஜெயசந்திரன் பாடிய 3 பாடல்களும் இன்றைக்கும் பலருக்கு தாலாட்டாக உள்ளது

விஜயகாந்தின் படத்தில் சோகப்பாடல் என்றால் ஜெயசந்திரனை கூப்பிடுங்க... என்று கூறும் அளவிற்கு அவரது பாடல்கள் உருக்கமாக அமைந்தது

ஏ.ஆர் ரஹ்மான் இசையில் ரசிகர்களின் மனங்களை கத்தாழங் காட்டுவழிக்கு அழைத்துச்சென்றவர் ஜெயசந்திரன்

எஸ்.ஏ. ராஜ்குமார் இசையில் அவர் பாடிய சின்னபூவே மெல்ல பேசு என்ற பாடல் பட்டிதொட்டியெல்லாம் பிரபலமானது

விஜய்யின் முதல் பிளாக்பஸ்டர் ஹிட்டான பூவே உனக்காக படத்தில் ஜெயசந்திரனின் குரல்வளம் அடுத்த தலைமுறையையும் ரசிக்க வைத்தது

அஜீத்தின் அவள் வருவளா படத்திற்காக காதலின் சங்கீதத்தை ஓங்கி ஒலிக்கச் செய்தவர் ஜெயசந்திரன்

ரஜினியின் பாபா படத்திலும் அவர் பாடிய பின்னணிப் பாடல் ரசிகர்களை ரசிக்க வைத்தது

பாடகர் கே.ஜே. யேசுதாஸின் குரலுடன் ஒத்துபோகும் மென்மையான குரலுக்கு சொந்தகாரரான ஜெயசந்திரன், 2000-மாவது ஆண்டுக்கு பின்னர் தமிழில் அதிகளவில் பாடல்களைப் பாடாவிட்டாலும், தொடர்ந்து மேடைக் கச்சேரிகளில் பங்கேற்று தனது பாடல்களால் ரசிகர்களை தாலாட்டினார்

80 வயதை எட்டிய நிலையில் வயது மூப்பு மற்றும் உடல் நலக்குறைவால் திருச்சூரில் உள்ள மருத்துவமனையில் அனுமதிக்கப்பட்ட ஜெயசந்திரன் அங்கு காலமானார். மொழிகளை கடந்து பறந்த இந்த இசை பறவை தனது சிறகுகளை சுருக்கிக் கொண்டது.

அவரது இல்லத்தில் ஜெயசந்திரனின் உடலுக்கு திரையுலகினர் , அரசியல் பிரமுகர்கள் ரசிகர்கள் அஞ்சலி செலுத்தினர்