தூத்துக்குடி மாவட்டம் ஆறுமுக மங்கலத்தை சேர்ந்த ஐ.டி ஊழியர் கவின் , மாற்று சாதியை சேர்ந்த பெண்ணை காதலித்ததால், காதலியின் சகோதரனால் வெட்டிக் கொலை செய்யப்பட்டார்.

இந்த கொலை தொடர்பாக அந்த பெண்ணின் சகோதரன் சுர்ஜித் கைதான நிலையில் அவர் மீது குண்டர் சட்டத்தில் நடவடிக்கை எடுக்க கோரி காவல் ஆணையர் சந்தோஷ் உத்தரவிட்டார்.

மேலும் சுர்ஜித்தின் பெற்றோர்களான, காவல் உதவி ஆய்வாளர்களாக இருந்த தாய் தந்தை மீது கொலை வழக்கு பதிவு செய்து, இருவரும் சஸ்பெண்டு செய்யவும் உத்தரவிடப்பட்டது.

திருமாவளவனிடம் செல்போனில் பேசிய எவிடன்ஸ் கதிர், சம்பந்தப்பட்ட பெண், கவினை காதலிக்கவில்லை என்று கூறியிருப்பதாக செய்திகள் வருகின்றது, ஆனால் அந்த பெண் கவினுடம் இருக்கின்ற புகைப்படங்கள், சாட்டிங் எல்லாம் ஏராளமாக கையில் இருப்பதாக தெரிவித்தார்

தொடர்ந்து திருமாவளவன், கொல்லப்பட்ட கவினின் தந்தை சந்திரசேகரிடம் பேசி ஆறுதல் தெரிவித்தார்

சுர்ஜித்தின் பெற்றோர் இருவரையும் சஸ்பெண்ட் செய்தாலும், அவர்கள் இருவரையும் கைது செய்யும் வரை கவினின் உடலை வாங்கமாட்டோம் என கவினின்உறவினர்கள், சொந்த ஊரான ஆறுமுக மங்கலம் கிராமத்தில் மூன்றாவது நாளாக உறவினர்கள் கருப்பு பேட்ஜ் அணிந்து அமைதி போராட்டத்தில் ஈடுபட்டு வருகின்றனர்.

மேலும் கவினை தான் காதலிக்கவே இல்லை, என கவினின் காதலி காவல்துறையினரிடம் கூறியதாக பரவி தகவலை பார்த்து ஆத்திரமடைந்த கவினின் ஆதரவாளர்கள் , கவினின் காதலியை இணையத்தில் வசைபாடி வந்தனர். அதுமட்டுமில்லாமல் கவின் தனது காதலியோடு இருக்கும் புகைப்படங்களையும் பதிவிட்டு, பக்கம் பக்கமாக கண்டன ரைட் அப்களையும் எழுதி வருகின்றனர்.

தற்போது இதுகுறித்து உண்மை சரிபார்ப்பு குழுவின் திட்ட இயக்குனர், அயன் கார்த்திகேயன், தனது சமூக வலைதள பக்கத்தில் பதிவு ஒன்றை பதிவிட்டுள்ளார்.

அந்த பதிவில். "கவினை காதலிக்கவில்லை' என்று அந்தப் பெண் சொன்னதாக செய்தி ஒன்று வெளியாகி, அப்பெண்ணின் புகைப்படம் வெளியிடப்பட்டு வருகிறது. கவினின் காதலி அவ்வாறு காவல்துறையினரிடம் தெரிவித்தார் என உறுதிப்படுத்தி அதிகாரப்பூர்வமாக எந்த தகவலும் வரவில்லை என்றும் அந்த பெண் அவ்வாறு எங்கேயும் பதிவு செய்யவில்லை மேலும் அந்தப் பெண் அப்படி தெரிவிக்கவில்லை என்று காவல்துறை உயர் அதிகாரி மூலம் என்னால் தெரிந்து கொள்ள முடிந்தது என்றும் அவர் பதிவிட்டுள்ளார்.

இணையத்தில் பரவிய தவறான தகவல்களை வைத்து சிலர் அந்த பெண்ணின் புகைப்படத்தை பகிர்ந்து சிலர் கவிதைகள் எழுதுவதாகவும் அவர் குறிப்பிட்டுள்ளார்.

அதுமட்டுமில்லாமல் இது தனது தொழில்முறை எல்லைக்கு அப்பாற்பட்டது என்றாலும், இதைச் சொல்ல நான் நிர்பந்திக்கப்படுகிறேன் என அந்த பதிவில் அவர் குறிப்பிட்டுள்ளார்.

அதே நேரத்தில் கொலை செய்யப்பட்ட கவின் தனது நண்பர்களோடு மகிழ்ச்சியாக இருந்த வீடியோக்களும் தற்போது இணையத்தில் வைரலாக பரவி வருகிறது.