ஐடி ஊழியர் கவின் கொலை வழக்கில் காதலித்த பெண்ணின் சகோதரர் , தந்தை ஆகியோரை தொடர்ந்து, தாயையும் கைது செய்ய கோரிக்கை வலுத்து வரும் நிலையில் , “கவினை உண்மையாக காதலித்ததாகவும் இந்த கொலைக்கும் தனது தாய் தந்தைக்கும் எந்த சம்பந்தமும் இல்லை” என்றும் சுபாஷினி உருக்கத்துடன் வீடியோ ஒன்றை வெளியிட்டுள்ளார்

நெல்லையில் சகோதரியை காதலித்த ஐடி ஊழியர் கவினை வெட்டிக் கொலை செய்ததாக பெண்ணின் சகோதரர் சுர்ஜித் கைது செய்யப்பட்டார்.

கவினின் தந்தையும், அவரது சமுதாயத்தினரும் சுர்ஜித்தின் தாய் தந்தை இருவரும் காவல் உதவி ஆய்வாளர்களாக இருப்பதால் அவர்கள் கைது செய்யப்படவில்லை என்று கூறி தொடர் போராட்டத்தில் ஈடுபட்டு வந்ததால் சுர்ஜித்தின் தந்தை சரவணன் கைது செய்யப்பட்டார்.

தற்போது சுர்ஜித்தின் தாயையும் கைது செய்யக்கோரி கவினின் தந்தை தொடர்ந்து போராட்டத்தை முன்னெடுத்து வருகின்றார்.

இந்த நிலையில் தனக்கும் கவினுக்கும் உள்ள உறவு குறித்தும், இந்த கொலையில் தனது தாய் தந்தைக்கு எந்த சம்பந்தமில்லை என்றும் கவினை காதலித்ததாக கூறப்படும் சுபாஷினி வீடியோ ஒன்றை வெளியிட்டுள்ளார்.

தன்னுடைய பீலிங்க்ஸ் குறித்து வீடியோ வெளியிட்ட பெண் ஒருவருக்கு நன்றியும் தெரிவித்தார்

பின்னர் சிறிது நேரத்தில் மற்றொரு வீடியோ சுபாஷினி தரப்பில் இருந்து வெளியானது, அதில் கவினை உண்மையாக காதலிச்சதாக தெரிவித்த சுபாஷினி, தங்கள் காதல் விவகாரம் சகோதரர் சுர்ஜித்துக்கு மட்டுமே தெரியும் என்றும் அவன் மூலம் விவரம் தெரிந்து தந்தை தன்னிடம் விசாரித்த போது தான் காதலிக்க வில்லை என்று சொன்னதாகவும் , சுபாஷினி தெரிவித்தார்.

திருமணத்துக்கு கவின் 6 மாதம் டைம் கேட்டதால் அப்படி சொன்னதாகவும், மே மாதம் கூட சுர்ஜித்தும், கவினும் சந்தித்து பேசியதாகவும் தங்கள் வீட்டுக்கு பெண் கேட்டு வருமாறு சுர்ஜித் சொன்னதாகவும் தெரிவித்த சுபாஷினி, சம்பவத்தன்று கவினை தான் அழைக்க வில்லையென்றும் , தனது மருத்துவமனைக்கு தாத்தாவை அழைத்து வந்த கவின், மருத்துவமனைக்குள் கூட வரவில்லை என்றும் , சுர்ஜித்துடன் , கவின் வெளியே போனது கூட தனக்கு தெரியாது என்றும் சுபாஷினி தெரிவித்தார்

கவினுக்கு ஆதரவாக சமூக வலைதளங்களில் கருத்து பதிவிடுவோர், சுபாஷினி வெளியிட்டுள்ள வீடியோவையும் , அதில் அவர் குறிப்பிட்டுள்ள கருத்துக்களையும் கடுமையாக விமர்சித்து வருகின்றனர்.