தமிழ் திரையுலகின் பிரபல காமெடி நடிகர் மதன் பாப் உடல் நலக்குறைவால் காலமானார். அவருக்கு வயது 71. வசனம் பேசி சிரிக்க வைப்பவர்கள் மத்தியில், முக பாவனைகளாலும், வித்தியாசமான புன்சிரிப்பாலும் ரசிகர்களை கவர்ந்த மதன் பாப் , கடந்த ஒரு வருடத்துக்கு முன்பு மரணத்தை வென்றவர் தற்போது உயிரிழந்த பின்னணி குறித்து விவரிக்கின்றது இந்த செய்தித்தொகுப்பு..

நீங்கள் கேட்டவை படத்தில் இடம் பெற்ற பாடலில் ரசித்து கீபோர்டு வாசிக்கும் இசைக்கலைஞராக தமிழ் சினிமாவில் அறிமுகமானவர் நிஜ இசைக்கலைஞர் கிருஷ்ணமூர்த்தி என்கிற மதன் பாப்..!

மதன் பாப் இசைக்குழுவில் இருந்து தான் இசையமைப்பாளர் ஏ.ஆர் ரஹ்மான் இசைப்புயலாக உருவெடுத்தார். அந்தவகையில் ஏ.ஆர் ரஹ்மானின் குரு மதன் பாப் என்கின்றனர் திரையுலகினர்.

இசைக் கச்சேரிகளை நடத்தி வந்தாலும், சினிமாவிலும் தொடர்ந்து சிறிய வேடங்களில் நடித்து வந்தார். குறிப்பாக பூவே உனக்காக படத்தில் கதா என்ற கதாபாத்திரத்தில் நடித்து சார்லியுடன் சேர்ந்து ரசிகர்களை சிரிக்கவைத்தார்.

ப்ரண்ட்ஸ் படத்தில் இதோ வந்துட்டேன் என்று அவர் ஓடி வந்து செய்யும் அலப்பறையால் அரங்கம் அதிர்ந்தது.வடிவேலுவின் குழுவில் இணைந்து ஐயா, காமராசு, சுந்தரா டிராவல்ஸ் என ஏராளமான படங்களில் ரசிகர்களை சிரிக்க வைத்தார் மதன் பாப்

தெனாலி, வில்லன், ப்ரியமான தோழி என தமிழில் மட்டும் 180க்கும் அதிகமான படங்களில் நடித்துள்ளார் மதன்பாப்.மலையாளத்தில் 2 படங்களிலும் இந்தி, தெலுங்கில் தலா ஒரு படத்திலும் நடித்துள்ளார்.

செல்லமே, கிரி என்று அவர் நடித்த படங்கள் ஒவ்வொன்றும் அவரது குணசித்திர நடிப்பின் பெருமையை சொல்லும் விதமாக அமைந்தது.

ஒரு கட்டத்தில் தொலைக்காட்சியில் முழு நீள நகைச்சுவை நிகழ்ச்சி ஒன்றை வழங்கி மேலும் புகழ் அடைந்தார் மதன்பாப். ((அதிதீவிர மதுப்பிரியரான)) மதுப்பழக்கமும் இருந்த நிலையில், புற்றுநோய் பாதிப்புக்குள்ளான மதன் பாப், கடந்த ஒரு வருடத்துக்கு முன்பு உடல் மெலிந்து , தனியார் மருத்துவமனை ஒன்றில் தீவிர சிகிச்சைக்கு பின்னர் கேன்சருடன் போராடி மரணத்தை வென்று வீடு திரும்பினார்.

பொருளாதார ரீதியில் நொடிந்த அவர் கடந்த ஒரு வருடத்துக்கும் மேலாக அடையாறில் உள்ள தனது வீட்டில் இருந்தபடியே மருந்து எடுத்து வந்தார். இந்த நிலையில் மதன்பாப் சனிக்கிழமை மாலை 5:30 மணியளவில் உடல் நலக்குறைவால் காலமானார். அவரது மகன் மற்றும் உறவினர்கள் மதன் பாப் வீட்டிற்கு சென்று இறுதி அஞ்சலிக்கு தேவையான ஏற்பாடுகளை செய்தனர். மதன்பாப்பின் மரணம் அவரது குடும்பத்தினரை மட்டுமல்லாமல் திரை ரசிகர்களையும் சோகத்தில் ஆழ்த்தி உள்ளது.