மும்பையைச் சேர்ந்த நபர் ஒருவருக்கும், சத்தீஸ்கர் மாநிலம் ராய்ப்பூரைச் சேர்ந்த பெண் ஒருவருக்கும் கடந்த சில ஆண்டுகளுக்கு முன் திருமணம் நடைபெற்றது. பின்னர் கணவன் - மனைவிக்கு இடையே ஏற்பட்ட கருத்து வேறுபாடு காரணமாக இருவரும் பிரிய முடிவு செய்தனர். அதற்காக இருவரும் விவாகரத்து பெற்றனர்.

விவாகரத்து வழக்கின் விசாரணை நடைபெற்றபோது, மனைவி தனது கணவரை ஆண்மையில்லாதவர் என குறிப்பிட்டார். இதனால் கோபமடைந்த கணவர், தன்னை ஆண்மை இல்லாதவர் எனக்கூறி அவதூறு பரப்பியதாக மும்பை செஷன்ஸ் நீதிமன்றத்தில் மனைவி மீது மனு தாக்கல் செய்தார்.

இந்த வழக்கை விசாரித்த மும்பை செஷன்ஸ் நீதிமன்றம், கணவரின் புகார் குறித்து விசாரிக்குமாறு மாஜிஸ்திரெட்டு கோர்ட்டுக்கு உத்தரவிட்டது. இந்த உத்தரவை ரத்து செய்ய கோரி மனைவி தரப்பில் மும்பை உயர் நீதிமன்றத்தில் மேல்முறையீடு செய்யப்பட்டது.

இந்த மனு மீதான விசாரணை நீதிபதி எஸ்.எம்.மோதக் அமர்வில் நடந்தது. மனுவை விசாரித்த நீதிபதி, திருமணத்தில் ஒரு பெண் எப்படி பாதிக்கப்பட்டுள்ளார் என்பதை நியாயப்படுத்த இது போன்ற குற்றச்சாட்டை கூறுகிறார்.

விவாகரத்து தொடர்பான வழக்கில் ஆண்மை தொடர்பாக கூறுவது அவசியமானது, தம்பதிக்கு திருமண உறவில் பிரச்னை ஏற்பட்டுள்ளது.

மனைவி அவரது நலன்கருதி இதுபோன்ற குற்றச்சாட்டை தெரிவிப்பது நியாயமானது தான், இதை அவதூறாக கருத முடியாது என நீதிபதி தெரிவித்தார். மேலும் பெண்ணுக்கு எதிராக கணவர் தொடர்ந்த வழக்கை தள்ளுபடி செய்யுமாறும் நீதிபதி உத்தரவிட்டார்.