நெருக்கடி மற்றும் அவதூறுகளுக்கு இடையே தமிழ்நாடு இரட்டை இலக்க வளர்ச்சி விகிதத்தை எட்டி வெற்றிபெற்றுள்ளதாக முதலமைச்சர் மு.க.ஸ்டாலின் தெரிவித்துள்ளார்.

சென்னை நந்தம்பாக்கம் வர்த்தக மையத்தில் நடைபெற்ற நிகழ்ச்சியில் நகராட்சி நிர்வாகம் மற்றும் குடிநீர் வழங்கல்துறை சார்பில் உதவி பொறியாளர்கள் உள்ளிட்ட பணியிடங்களுக்கு தேர்வான 2,538 இளைஞர்களுக்கு பணி ஆணைகளை முதலமைச்சர் வழங்கினார்.

 பின்னர் உரையாற்றிய முதலமைச்சர், முன்னதாக 2011ஆம் ஆண்டில் கருணாநிதி ஆட்சியில் தமிழ்நாட்டின் வளர்ச்சி இரட்டை இலக்கத்தில் இருந்த நிலையில் 14 ஆண்டுகளுக்கு பிறகு 11.19% என்ற வளர்ச்சி விகித்தை எட்டியுள்ளதாக கூறினார்.

தன்னை நம்பி ஆட்சியை ஒப்படைத்த தமிழக மக்களுக்கு இந்த வெற்றியை காணிக்கையாக்குவதாகவும் அவர் குறிப்பிட்டார்.

மேலும், கடந்த 4 ஆண்டுகளில் 6 லட்சத்து 41 ஆயிரம் வேலை வாய்ப்புகளை உருவாக்கியுள்ளதாகவும் முதலமைச்சர் தெரிவித்தார். தமிழ்நாட்டில் 20 லட்சம் கல்லூரி மாணவர்களுக்கு விரைவில் இலவச லேப்டாப் வழங்க உள்ளதாகவும் அவர் அறிவித்தார்.