குடும்ப நல அறுவை சிகிச்சைக்கு வந்த ஏழ்மையான மக்களிடம் பண வசூல் செய்து செல்ஃபோன் கவரில் பத்திரப்படுத்திவிட்டு, கையில் பணமில்லாததால் G-Pay செய்வதாக கூறிய மற்றொரு ஏழை அட்டெண்டரிடம் ”அப்புறம் தர்றீங்களா? தர்றேன்னு சொல்லிட்டு ஏமாற்றக்கூடாது” என கூறுவதும், இன்னொரு பெண்ணிடம் 200 ரூபாய் லஞ்சமாக பெறும் வீடியோ காட்சிதான் இது....

கள்ளக்குறிச்சி மாவட்டம் சங்கராபுரம் அருகே உள்ள புதுப்பேட்டை- புதுப்பட்டு அரசு ஆரம்ப சுகாதார நிலையத்தில், குடும்ப நல அறுவை சிகிச்சை செய்வதற்காக சென்ற தாய்மார்களிடம் ஒரு நபருக்கு 300 ரூபாய் என மூன்று நபர்களிடம் பணத்தை பெறும் மருத்துவமனை ஊழியரின் வீடியோ சமூக வலைத்தளங்களில் வைரல் ஆகி உள்ளது.

அந்த வீடியோவில் Google Pay-யில் அனுப்பவா என்று கேட்டதற்கு, சிறிது நேரம் கழித்து வருகிறேன் எனக்கு கையில் காசு கொடுங்கள் என்று சொல்லும் காட்சியும் இடம் பெற்றுள்ளது.

இதனைத் தொடர்ந்து, அந்த ஊழியர்களிடம் இதுகுறித்து பொதுமக்கள் கேட்கும்போது, மருத்துவமனையில் என்னை வாங்க சொல்கிறார்கள். அதனால்தான், நான் வாங்குகிறேன் என அலட்சியமாக கூறியதாக சொல்லப்படுகிறது.

இந்த குற்றச்சாட்டு தொடர்பாக, அரசு ஆரம்ப சுகாதார நிலைய மருத்துவர் டாக்டர் முத்துக்குமரனை நாம் தொடர்பு கொண்டு பேசியபோது, இதுவரை இதுபோன்ற நிகழ்வு நடந்ததில்லை. மருத்துவமனை ஊழியர் ஒருவர் இந்த தவறை செய்திருக்கிறார்கள் என்ற தகவல் என்னிடம் வந்திருக்கிறது. அவர்கள் மீது உரிய நடவடிக்கை மேற்கொள்ளப்படும் என கூறினார்.

மேலும், அந்த ஊழியர் தப்பிப்பதற்காக மருத்துவமனை மீது பொய்யான குற்றச்சாட்டை தெரிவித்து வருகிறார். எனவே, அந்த ஊழியர் மீது உரிய நடவடிக்கை எடுக்கப்படும் என்றும் மருத்துவர் தெரிவித்துள்ளார்.

இந்தநிலையில், அரசு ஆரம்ப சுகாதார நிலைய ஊழியர்கள் லஞ்சம் வாங்குவதை தைரியமாக வீடியோ எடுத்து வெளியிட்ட பெண்ணிற்கு பாராட்டுகள் குவிந்து வருகின்றன.