சென்னை கே.கே நகரில் சாலையில் இரண்டு இளம்பெண்கள் இணைந்து, ஒரு வாலிபரை கட்டை மற்றும் கையால் சரமாரியாக தாக்கிய சம்பவத்தால் பரபரப்பு ஏற்பட்டது.

குறிப்பாக, அந்த இரு பெண்களும், அந்த இளைஞரை கஞ்சா போதையில் தாக்கி கொள்வதாக அந்த வீடியோ பரவியதால் பெரும் பரபரப்பை ஏற்படுத்தியது. இந்நிலையில், கே.கே. நகர் காவல்நிலையம் அருகே நடந்த இச்சம்பவம் தொடர்பாக இருதரப்பையும் போலீசார் காவல்நிலையம் அழைத்து சென்று விசாரணை மேற்கொண்டனர்.

முதற்கட்ட விசாரணையில் நெசப்பாக்கத்தை சேர்ந்த 22 வயதான இளம்பெண், சட்டப்படிப்பு முதலாம் ஆண்டு படித்து வரும் நிலையில், அசோக் நகரைச் சேர்ந்த கார்த்திக்கேயன் என்பவருடன் 6 வருடங்களாக நட்பாக இருந்த நிலையில், கடந்த இரண்டு வாரங்களாக கருத்து வேறுபாடு ஏற்பட்டு இருவரும் நட்பை துண்டித்துக்கொண்டதாகக் கூறப்படுகிறது. இதனால், மூன்று நாட்களுக்கு முன்னதாக கார்த்திகேயன் இளம்பெண்ணின் வீட்டிற்கு சென்று பிரச்சனை செய்துவிட்டு சென்றதாக கூறப்படுகிறது. இந்த நிலையில், மாலை நேரத்தில் இளம்பெண் தனது சகோதரியுடன் கடைக்கு சென்ற போது அங்கு AP பத்ரோ சாலையில் கார்த்திகேயன் மற்றும் அவரது தாயாரும் இருந்துள்ளனர்.

இருதரப்புக்கும் வாக்குவாதம் ஏற்பட்ட நிலையில், முதலில் கார்த்திகேயன் தாக்கியதாகவும், அவரது தாயார் தங்களை திட்டியதால், இரண்டு பெண்களும் சேர்ந்து கார்த்திகேயனை கட்டையால் தாக்கியதும் தெரியவந்தது.

இதில், கார்த்திகேயனுக்கு தலையில் லேசான காயம் ஏற்பட்ட நிலையில், கேகே நகர் அரசு மருத்துவமனைக்கு சென்று சிகிச்சை பெற்று, காவல்நிலையம் வந்த நிலையில், இருதரப்பினரும் சமாதானமாக செல்வதாக கூறியுள்ளனர்.

இனி எனது வாழ்க்கையில் கார்த்திகேயன் குறிக்கிடக்கூடாது என அந்த பெண்ணும், அதே போல கார்த்திகேயனும் எழுதி கொடுத்ததன் பேரில், இருதரப்பையும் எச்சரித்து, அனுப்பி வைத்துள்ளனர் போலீசார்.

எனவே, ‘தீ பொறி’ திருமுகம், ‘நெருப்பு’ நீலமேகம், ‘என்கவுண்டர்’ ஏகாம்பரம், ‘அலார்ட்’ ஆறுமுகம் என பெயருக்கு முன்னால் எதையே சேர்த்துக்கொண்டதுபோல, இந்த வீடியோவுடன் வேறு ஏதேனும் செய்தியை சேர்த்து இஷடத்துக்கு பரப்ப வேண்டாம் என காவல்துறையினர் அலெர்ட் செய்துள்ளனர்.