டெல்லி நிஜாமுதீனில் கால பாட நடிகை Huma Qureshi -யின் சகோதரர் படுகொலை செய்யப்பட்ட சம்பவமும் அதன் சி.சி.டி.வி காட்சிகளும் வெளியாகி பெரும் பரபரப்பை ஏற்படுத்தியுள்ளது. இதற்கெல்லாம், இவ்வளவு பெரிய வன்முறையா? என யோசிக்கும் அளவுக்கு நடந்த துயர சம்பவம் குறித்து விவரிக்கிறது, இந்த செய்தி தொகுப்பு...

ஹரிஷ் கல்யாண் - எம்.எஸ். பாஸ்கர் நடிப்பில் ராம்குமார் பால கிருஷ்ணன் எழுதி இயக்கிய படம் ‘பார்க்கிங்’. ஒரு பார்க்கிங் பிரச்சனையால், இரண்டு வாடகைதாரர்களுக்கு இடையே எழும் ‘ஈகோ’ கடைசியில் ஒருவரை ஒருவர் கொலை செய்ய முயற்சிக்கும் அளவுக்கு கொண்டுபோவதை, வலை பின்னலோடு, சினிமாத்தனம் இல்லாமல், மிக மிக எதார்த்தமாக வெளிப்படுத்திய படம்.

சாதாரண பார்க்கிங் பிரச்சனைதானே? என யோசிக்கலாம். ஆனால், மனித மனங்களுக்குள் புதைந்துகொண்டிருக்கும் வன்மம், குரோதம், குரூரம் எல்லாம் எப்படி வெளிப்பட ஆரம்பிக்கிறது, என்பதை வெளிச்சம் போட்டு காண்பித்த படம். அதனால்தான், சிறந்த தமிழ்த் திரைப்படத்துக்கான தேசிய விருது, அதில் நடித்த எம்.எஸ்.பாஸ்கருக்கு சிறந்த துணை நடிகர் விருது, இயக்குநர் ராம்குமார் பாலகிருஷ்ணனுக்கு சிறந்த திரைக்கதைக்கான விருது என மூன்று தேசிய விருதுகளை வாங்கிக் குவித்தது. ஆனால், விருது அறிவிக்கப்பட்ட சில நாட்களிலேயே, இப்படியொரு பார்க்கிங் படுகொலை மனித மனங்களை உலுக்கி எடுத்திருக்கிறது. எது நடக்கக்கூடாது என அத்திரைப்படம் வலியுறுத்தியதோ அது நடந்துவிட்டது.

டெல்லி நிஜாமுதீன் பகுதியிலுள்ள வீட்டில் மனைவி ஷாஹீன் ஆசிப்புடன் வசித்து வந்துள்ளார், காலா பட நடிகை ஹூமா குரேஷியின் சகோதரர், Asif Qureshi.

ஆசிப் குரேஷி தனது பணியை முடித்துவிட்டு இரவு 11 மணியளவில் வீடு திரும்பியுள்ளார். அப்போது, வீட்டிற்கு முன்னால் நிறுத்திவைக்கப்பட்டிருந்த இரு சக்கர வாகனத்தை அகற்றுமாறு பக்கத்து வீட்டுக்காரரிடம் வலியுறுத்தியுள்ளார். இதனால், வாக்குவாதம் ஏற்பட்டு பிரச்சனையாக மாறியதாக கூறப்படுகிறது. பக்கத்து வீட்டுக்காரர்களான கெளதம் -உஜ்வால் சகோதர்கள் Asif Qureshi யின் சட்டையை பிடித்துக்கொண்டு சண்டை போட்டுள்ளனர்.

மேலும் பிரச்சனை பெரிதாகி, ஆசிப் குரோஷியை கூர்மையான ஆயுதங்களால் தாக்கியதாக கூறப்படுகிறது. Asif Qureshi யின் மனைவி தடுக்க முயன்றும் அவரால் காப்பாற்ற முடியவில்லை. இதனைத் தொடர்ந்து, அருகிலுள்ள மருத்துவமனைக்கு ஆசிப் குரோஷி கொண்டு செல்லப்பட்ட நிலையில், அவரை பரிசோதித்த மருத்துவர்கள் அவர் ஏற்கனவே உயிரிழந்துவிட்டார் என கூறியுள்ளனர். இது தொடர்பாக வழக்குப்பதிவு செய்துள்ள காவல்துறை, கொலைக்கு காரணமான கௌதம் மற்றும் உஜ்வால் ஆகிய சகோதரர்கள் இரண்டு பேரை கைது செய்துள்ளனர்.

ஏற்கனவே, இரு சக்கர வாகனத்தை நிறுத்துவது தொடர்பான பார்க்கிங் பிரச்சனை, ஆசிப் குரேஷிக்கும் பக்கத்து வீட்டுக்காரருக்கு தொடர்ந்து இருந்துவந்ததாக கூறப்படுகிறது.
பக்கத்து வீட்டுக்காரர் கெளதம் குடிபோதைக்கு அடிமையானவர் என்பதும் அடிக்கடி இவர்கள் பிரச்சனை செய்வதால், அந்த வீட்டிலிருந்து தாய் வெளியேறிவிட்டதாகவும் தந்தை மட்டுமே இவர்களுடன் வசித்து வருவதாகவும் கூறப்படுகிறது.